J

die er deß vnfleisses verdechtig helt, damit sie also zum
Studiren vnnd bessern fleiß excitiert vnd angehalten werden.
Er sol sich auch vnderweylen an die ort, da jeder Pfarr—
herr wohnet, verfügen, vnnd nicht allein die Kirchenbew vnd
Pfarrheuser, wie die stehen vnd gehalten werden, besichtigen,
sondern auch des Pfarrherrn bücher durchsehen, sich seines
studierens vnnd fleisses, auch aller seiner verhaltung im lehren
vnnd leben erkündigen, vnd darneben, da sonsten auch bey
der Gemeine mangel vnd gebrechen fürgefallen, dieselbigen
nach allem vermögen zur besserung bringen.
Insonderheit aber sol auch ein jeder Superintendens
der Kirchen halber, daran vnsern gnedigen Grauen vnnd
Herrn das Jus patronatus zukompt, sie seyen in oder ausser—
des Landes gelegen, zusehen, das solche gerechtigkeit gebür—
licher weise gehandthabt, und nicht geschmelert werde.

—

Was aber der vom Adel Pfarren sein, sol er dieselben
auch zum wenigsten, Jahrs einmal, laut vorhin außgangener
vnd dieser jetzigen Ordenung visitieren, auch Kirchen vnd
Kaftenrechnungen anhören, vnnd an stadt Schultheissen vnd
Beampten, sie die Junckern selbst darzu fordern, daß ent—
weder sie selbst in der person darbey sein, oder aber jhre
Vögte vnd Diener darzu schicken.
Es söllen auch die Superintendenten darauff bedacht
sein, das ein jeder nicht allein alle Jahr in allen Stedten
seines befohlenen Bezirks obgedachter massen seine Visitation
verrichte, sondern daß er auch zum wenigsten in dreyen
Jahren einmal an alle örter, es seyen Stedte oder Dörffer,
sich verfüge, ein Predigt allda für der Gemeine thue oder
den Pfarherr deß orts thun lasse, nach gehaltener Predigt
beide junge vnnd alte im Catechismo examinire, mit fleiß
sich erkündige deß Pfarrherrs vnnd aller Kirchendiener lebens
vnd wandels: Dergleichen wie sich das Volck gegen den
Pfarrherr vnnd andere Kirchendiener vnd jhr Amt erzeige,
die Kirchen vnd Pfarrbew besichtige, vnnd alle gelegenheit vnnd
standt der Kirchen jedes orts erforschen, vnd da in einigem